Kongeleg

Eit lite samarbeidsprosjekt mellom Harefrøken, far og mor. Kronene og glitteret er sjølvsagt på plass. Noko som resulterte i full glitterutvask etterpå... Framleis glitrar me. Men litt kvardagsglam er vel heilt OK.

Ha ein glitrande kveld!

Lett på tå

Foten er tung

Beksaumtung

Nattevaktstung

Kvile no

for trufaste slitarar

Imorgon

lett på tå

Gullfisk

Det seiest av gullfisken huskar veldig dårleg. At det er difor han ser så lukkeleg ut, der han sym rundt og rundt i gullfiskbolla. Ikkje veit eg. Men at eg har gjort tiltak i forhold til min eigen hukommelse er heilt sikkert.

Gode idear kjem når-som-helst. Og ein augneblink seinare kan dei vere vekk. Så difor har eg lært meg å teikne dei ned. Notisblokka er med overalt. Så kan eg hente dei fram igjen når eg faktisk har tid til å gjennomføre.

Av og til - eller ganske ofte - må eg opp midt på natta. Men det er det verdt...

Fin mandag til deg!

Ut med jula

No er det vel strengt tatt på tide å rydde jula ut. Men surt og mørkt ver ute, gjer at den fine, elektriske julestjerna får stå. Me treng litt ekstra lys no.

Håpar du har ein fin søndag!

Rekalkulerer

Det snør. Mykje. Dei vårlege assosiasjonane har snødd ned. Men snø er fint òg! Likar knirken under skoen!

Her er det jobbehelg! God helg til deg!

*Eit lite tips frå mi blomstersvigerinne gir meg sviblar som står leeeeenge. Når blomen er avblomstra, skjer eg den av, og det grøne, vårlege får stå. Kanskje berre eg som treng slike tips, forsåvidt. Av og til kjem ein berre ikkje på...*

Meir leik

Eg er ein barnsleg sjel - ingen tvil om det. Det gjeld òg i høgaste grad mitt forhold til interiør. Eg likar ikkje alvorlege interiør. Prøver eg for hardt, blir det fort kjedeleg.

Det er når eg ikkje tenker for mykje, det blir bra. Koblar ut O'Store Dommar, så og seie. O'Store Dommar kan sette krokfot på kreativitet og leik. Det er ikkje bra.

Så det gjeld å tenke mindre. Føle meir. Ofte er den fysste tanken heilt rett. Second thoughts kan vere så oppskrytt! Så JA til å leike meir. Ikkje gje tanken for mykje spelerom! Gjere akkurat som du vil, utan tanke for kva andre vil meine. Finne barnet i deg!

Ha ein leikande dag!

Vårleg

Dei er visst berre inni hovudet mitt. Vårassosiasjonane. Snøen smeltar - er ikkje plenen enormt grøn under? Har ikkje lyset forandra seg? Litt varmare lys, liksom?

Eg veit det er for tidleg. Kvar januar trur eg det skal bli vår. Kvart år same lengten. Mot varmare, lysare, grønare. Kvart år same lange ventetida.

Men eg veit den kjem. Våren. Kvart år gjer den det. Og kva er gale med å drøyme litt? Og pynte litt inne?

Ha ein fortryllande, vårlengtande dag!

Heldige meg fekk bilde måla av tantejenta mi! Det grøne bildet var så fint, takk Hannah!

Skatteskrin

Marihøna fekk seg eit skatteskrin til jul. (Nok ein gong spray og lim. Sei ifrå om de blir leie..;-))Hare Hopp passar på skattane. Dei stysste skattane no for tida er figurforma strikkar! Enkle gleder!

Nyåret byr på planar av alskens innhald. Ikkje nødvendigvis forsett, for ein kan likegodt starte noko nytt på ein kvardagsleg onsdag!

Så difor; ikkje noko stort - men ein liten trekning kjem på Vestablikk innan kort tid. Bloggen nærmar seg jo magiske 100 Venner, snart 20 000 unike treff og 200 innlegg sidan starten i november 2009! Stas!

Tirsdagsklem frå IJ

Lys i vente

Fine kalde vinterdagar med sol gir maksimalt med lys her vest. Likevel svinn lyset så fort. Når tanken på bloggebilder er tenkt, kan blåtimen allerede vere på veg.

No gler eg meg til fleire lyse timar! Og dei er på veg! Litt meir for kvar dag.

Her er juleferien snart til ende. Kvardagen ventar - og det det likar eg. Eg likar kvardagar! No må eg berre få orden på Elna og det vonde kneet...

God søndag til deg!

Spraymaling og sånn

Inspirert av ei flink dansk dame laga eg nokre brett før jul. Litt hamstring av gamle og nyare vasar på Fretex, fine dyr frå lekebutikken, kvit spraymaling og sterk lim - og vips så har ein noko ingen andre har. Viss ein likar slikt.

Ha ein fin kveld i det ferske året!