Marknadsglimt

Stor stas å vere med i år òg! Eg delte stand med bestekusine Ingrid, og nokre søte smånissar:-)

No har Elna gått ut i streik. Det blei nok litt lite overtidstillegg i dagane før marknaden. Eg får håpe ho snart er tilbake i vanleg arbeid - før abstinensene mine blir for store...

Ha ein fortryllande onsdag!

Raud og blå

Ein av mine favorittkombinasjonar for tida. Og det fins så mange fine nyansar av desse. Favorittfavoritten er lys turkis og oransje!

Enjoy!

Kva er din favorittkombinasjon?

Rosa

Rosa og lilla er Storesøster sine yndlingsfargar. Kanskje ikkje så uventa for ei jente på seks år...
Difor vart tøyposen ho fekk til bursdagen i sjølvsagte fargar, og til stor lukke.

.

Og så eit lite sommarbilde, frå mamma sin rosehage. No minkar det på rosene for i år. Men bildene har eg. Og lukta som lett let seg framkalle..:-)

Fin kveld til deg som kikkar innom!

Jovisst

Jovisst blei det kjole til slutt. Og visst passa den til Mollemor! Ho var til og med fornøyd med den, sjølv om ho helst ville ha "stooor kjole, mamma!", som eg trur betyr laaaang kjole...

Men du og du. Å sy utan mønster tar tid. Alt skal jo klekkast ut sånn heilt frå lause lufta. Og når treåringen syns det er pyton å prøve klede - ja, så blir det så som så med skreddarsaumen..;-) Men no er iallefall det prosjektet ferdig og tatt i bruk. To kjolar av ein meter stoff, à 59 kr. Kven sa at det ikkje lønna seg å sy sjølv..?

Ha ein fin fredag!

Prikkepute

Godtanten har hatt 60-årsdag i sommar - hurra for ho! Ho har vore mi reservemamma i oppveksten - god som gull! No fekk me feira henne litt, og det var stor stas!

Ho fekk prikkeputa, kanskje ei pute til å bli glad av? Og til å kvile hovudet på - ofte.

Det gamle vatt-teppet hugsar eg godt frå eg var liten - og det fekk eg no av mamma! Herlege, glade fargar!

Ha ein strålande fin tirsdag!

På galeien

Javel - så er eg på galeien igjen. Eg syr utan mønster. Kven veit om det blir ein ferdig kjole til Mollemor, eller om det blir i størrelse dukke...

Om eg har overdreven tru på eigne ferdigheter eller om det rett og slett berre er dumskap - er jammen ikkje godt å seie. Eg trør uti gong på gong. Det blir bra omtrent anna kvar gong. No bomma eg skikkelig sist, så då kan eg jo berre håpe denne gongen..:-)

Puta over er frå dagens Fretex-besøk. Utruleg skjønn!

Ellers så har eg fått ein kjempefin award frå skjønne Mammadamen. Og så glad eg blir for slikt! Har du ikkje kikka innom henne før - så gjer det her.

Ha ein fin kveld vidare!

Scootergirl

Scooter er tøft! Faktisk ein ting eg likar kjempegodt. Det skulle veldig gjerne ha vore ein snerten liten Vespa. Men peugeot funkar like godt. Sikkert bedre.

Suse avgårde til jobb, forbi morgonrushet, parkere ved inngongsdøra - og det heilt gratis! Jo, fordelane er heilt klart i pluss. At det av og til regnar her i byen, er lett å gløyme.

Behovet for eit nytt nett meldte seg her i sommar. Det forrige gav seg, pga høg alder. Då måtte det jo bli eit gult eit! Er det mogeleg å ikkje bli glad av gult? Eg bare spør.

Nettet er allereie døypt scooterveska. Det har mange kjekke scooterturar å sjå fram til!

Ei god natt til deg som ser innom!

Blåbær og sånn

Nytt eplekjekt dynetrekk til fine Lillebror. Tenk at eg skulle bli vaksen og trebarnsmor før eg skulle like turkis. Og blå. Sånn kan det gå. Nå forstår eg ikkje korleis eg har klart å unngå dei blå nyansane så lenge.

Apropos blå - dei fine, søte bæra er modne! På vår egen Blåbærhaug! Mmmmm...

Fin kveld til deg!

Til ein hjertevenn

Gåva er snart på eit postkontor nær deg, Ninni:-) Gratulerer med overstått, min venn!

Stoffa er plukka ut med omhu - til ei raud dame! Bokstavstoffet er frå Stoff og Stil, det raudprikkete blei mitt på Nattåpent forrige veke, til 70% avslag! Snakk om prikkekupp!

Ein god kveld til deg som kikkar innom!

Sov i ro, slumre inn...

Ei lita dyne til ei lita jente. Stoff frå tider langt tilbake. Trykk frå notida. Gammalt møter nytt.

Ein fin kveld til deg!

Hjartenøkkel

Det er kald sommar framleis her på vestlandet. Enn så lenge er det sokkar i sandalene og eit litt stivt smil. Då er det fint å ha meiningsfylte aktiviteter innomhus. Ikkje berre kos, sjølvsagt. Husarbeid må av og til òg prioriterast.

Dagens trykk er ein hjartenøkkel. Denne bør ikkje rotast vekk. Ikkje så farleg med dei andre nøklane, berre ein tar vare på denne.

Igår fekk bloggen min ein finfin pris frå denne skjønne bloggaren. Gjett om det gjorde meg glad! No må eg i tenkeboksen for å finne ut kva for 7 ting eg skal fortelle dykk...

Om du leiter etter tiaraen din, eller baker bryllupskake - eller ikkje bryr deg om bryllupet imorgon i det heile tatt - ha ein fin fredag uansett!

Lekedag

Kjekt å leike seg med eigne trykk. Finne nye fargar og nye uttrykk.

Ein lur mann har sagt: "hvis ikke folk gjorde fjollete ting fra tid til annen - ville det ikke skapes intelligente ting."

I Google sitt hovudkvarter i Silicon Valley satsar dei på leik. Dei har eit eige leikerom, der dei ansatte kjem inn for ein pause, og puslar litt med blant anna lego. Av slikt kan det komma idear og refleksjonar ein ikkje får elles.

Nå skal ikkje eg påberope meg at eg lagar intelligente ting. Men uansett: JA - til å leike meir!

Ein fin dag ynskjer eg deg!

Til lintøyskapet

Når eg ein gong får meg lintøyskap, skal det vere velduftande og skinande. Tellekantar og nystrokne putevar. Nett som ein Blenda-reklame.

Sengetøyskapet no husar alt for mykje anna enn bare sengetøy. Men det er jo lov å drøyme, ikkje sant? Og det luktar iallefall godt der, for lavendelposane er på plass.

Ein må begynne i det små.

Ha ein flott Grand Prix-dag - anten du ser på eller ikkje;-)

På langtur

Blå har absolutt ikkje vore min farge. Men no kjenner eg at det er i ferd med å endre seg. Denne puta syns eg faktisk blei ganske fin.

Den er allereie på veg over Atlanteren, til ei som er glad i både blått og kattar! Gratulerer med dagen, Kathy!

Happy birthday, Kathy! Hope you get a wonderful day! This pillow is on its way to you. I know you will enjoy the cats..:-)

Eg er ikkje her

Og ikkje lurar eg på kva eg skal bruke desse trykka og stoffa til heller. Dei ligg berre lett henslengt på golvet, og interesserer meg lite.

Det eg har lov til å tenke på derimot - er København. Så har du tips til fine turar, gode kafear, ting å gjere med små born, spennande butikkar - nøl ikkje med å skrive ein liten kommentar! Då blir eg GLAD!

Viss du er her - ha ein fortsatt fin kveld!

Eit eple om dagen

Eit eple om dagen skal visstnok gjere godt for magen.

Elles kan ein gå til Per i hagen. Sette seg på ein stein og gnage på eit bein.

Neimen om eg veit kva som funkar best - eple eller bein... Veit du?

Veskeblikk

Eit dynetrekk til ei jente, og ikkje til den andre..? Hm. Litt kjøpsslåing resulterte i at mor lovde søstermor ei veske.

Klart femåringen treng ei veske! På høg tid kan ein vel sei. Til å ha noko i. Eller ingenting, om ein vil. For det kjekkaste er jo å springe, så den hoppar på magen!

Og så føler ein seg så fin!

Ha ein fin kveld - med eller utan veske!

Ny dyne

Mollemor har vekse ut av dyna si. No stikk små tær fram frå dyna på eine sida, og eit nydeleg bustehår på andre sida:-)
Så juniordyne må det bli, oppi den fine voksesenga er det ikkje plass til meir. Men dynetrekk til juniordyne? - nei, det har me ikkje.

Men eg har masse flotte, gamle dynetrekk. Og kva er då meir naturleg enn å lage eit nytt i dei herlege gamle mønstra?

Igår laga eg nok eit kattetrykk, og det skal òg pynte dyna. No treng eg litt hjelp til å velge fargekombinasjonar på tilbehøret. Raudt eller blått..?

Apropos kattar; neimen om eg veit kvifor desse kattane stadig kjem til meg. Eg som ikkje eingong er glad i kattar. Trur eg...